Daginn sem TF-ABB hvarf sýndi rakning á síma Josh Neuman, sem er einn þeirra sem fórst með vélinni, nákvæmlega hvar vélina væri að finna í Þingvallavatni. Leit var þó ekki beint að þessu svæði sérstaklega fyrr en morguninn eftir.

Fréttablaðið skýrir frá þessu. Segir blaðið að þessi gögn hafi ekki borist stjórnendum leitarinnar fyrr en löngu eftir að einhverjir björgunarsveitarmenn voru komnir með þau í hendur. Þetta tafði leitina að vélinni fram á næsta dag að sögn blaðsins.

Blaðið segist hafa fengið mynd úr leitarforritinu Find My iPhone í hendur um klukkan 19 á fimmtudagskvöldið. Hún sýndi rakningu á farsíma Neuman. Fylgdi sögunni að þessi gögn væru komin í gagnagrunn björgunarsveita og segir blaðið að þau hafi einnig gengið manna á milli í flugheiminum hér á landi.

Það var ekki fyrr en á föstudagsmorguninn sem stjórnendur leitarinnar sögðust hafa fengið ný gögn frá erlendu símafyrirtæki og hófst þá leit í Ölfusvatnsvík sem varð til þess að flugvélin fannst.

Fréttablaðið hefur eftir Oddi Árnasyni, yfirlögregluþjóni á Suðurlandi, að lögreglan hafi fengið umræddar upplýsingar nóttina eftir að vélin fórst og hafi þau gefið betri mynd af staðsetningu vélarinnar