Á tíunda tímanum í gærkvöldi var tilkynnt um þjófnað úr íbúðarhúsnæði í Hafnarfirði. Þar hafði fingralangur gestur stolið úlpu, sem bíllyklar voru í, og fartölvu.

Í miðborg Reykjavíkur var tilkynnt um innbrot í íbúðarhúsnæði klukkan 19. Þar hafði verið farið inn um glugga og verðmætum stolið.

Á öðrum tímanum í nótt missti ökumaður stjórn á bifreið sinni og ók á ljósastaur á Kringlumýrarbraut. Flytja þurfti bifreiðina á brott með kranabifreið.

Tilkynnt var um slagsmál í Hlíðahverfi á öðrum tímanum í nótt. Þar var maður í annarlegu ástandi handtekinn en hann er grunaður um líkamsárás. Hann var vistaður í fangageymslu.

Á ellefta tímanum í gær var ökumaður handtekinn eftir að hraði bifreiðar hans mældist 126 km/klst á Reykjanesbraut í Kópavogi en leyfður hámarkshraði þar er 80 km/klst. Ökumaðurinn er grunaður um að hafa verið undir áhrifum fíkniefna.

Á Breiðholtsbraut missti ökumaður stjórn á bifreið sinni á ellefta tímanum í gærkvöldi og ók á ljósastaur. Flytja þurfti bifreiðina á brott með kranabifreið.

Einn ökumaður var handtekinn í Breiðholti í nótt en sá er grunaður um að hafa verið undir áhrifum fíkniefna og ítrekaðan akstur sviptur ökuréttindum.

Á fjórða tímanum var maður handtekinn í Árbæjarhverfi en hann er grunaður um líkamsárás og vörslu fíkniefna. Hann var vistaður í fangageymslu.