Svo virðist vera sem stjórn SUS, sambands ungra sjálfstæðismanna, sé komið með alveg upp í kok af samkomutakmörkunum sem eru í gildi hér á landi vegna Covid-19 faraldursins. Í röð færslna sem sambandið birti á Twitter-síðu sinni í dag eru stjórnvöld gagnrýnd harðlega en auk þess er skorað á ráðherra flokksins að gera eitthvað í málinu.

„Stjórnvöld hafa ekki sýnt nægilega fram á að svo strangar takmarkanir séu í samræmi við stöðu faraldursins þrátt fyrir fjölda smita. Þjóðin er fullbólusett gegn nýju og mun vægara afbrigði sem fylgir mun lægri innlagnartíðni. Aðrir mikilvægir samfélagslegir þætttir hafa ekki verið teknir til skoðunar, svo sem andleg, efnahagsleg og félagsleg áhrif frelsisskerðinga,“ segja ungu sjálfstæðismennirnir í færslunum.

Þá segja þeir að ekki hafi verið tekið nauðsynlegt tillit til aðstæðna ungs fólks og að sá hópur hafi þurft að færa miklar fórnir á undanförnum tveimur árum. „Eina leiðin til þess að ná víðtækri samstöðu að nýju er að sýna það í verki að markmiðið sé að aflétta takmörkunum. Það er hægt sé skynsemi og hófsemi beitt í ákvörðunartöku varðandi frelsisskerðandi aðgerðir,“ segir stjórnin svo.

„Sjálfstæðisflokkurinn er stærsti flokkurinn sem myndar ríkisstjórnina. Stjórn SUS neitar að trúa því að ráðherrar flokksins láti bjóða sér þessa stöðu mikið lengur. SUS ítrekar því áskorun sína, enn einu sinni, á ráðherra Sjálfstæðisflokksins að standa með frelsinu.“

Að lokum furðar stjórnin sig á því hvers vegna samkomutakmarkanir eru svo harðar hér á landi þrátt fyrir hátt hlutfall bólusettra og lágt innlagnarhlutfall smitaðra. „Fullbólusett þjóð, með innlagnarhlutfall sem nemur 0,05%, getur ekki látið bjóða sér 10 manna samkomutakmarkanir tveimur árum eftir að veiran kom til landsins. Frelsi hvort sem er til athafna, ferða eða funda, er ekki forréttindi. Frelsi í samfélagi manna er grundvallar mannréttindi.“