Arnþór Garðarsson, prófessor emerítus við Háskóla Íslands, lést á nýársdag í faðmi fjölskyldu sinnar. Frá þessu er greint á Facebook-síðu Fuglaverndar.

Arnþór fæddist í Reykjavík þann 6. júlí árið 1938. Meginviðfangsefni hans um ævina voru rannsóknir á fuglum og birti hann fyrstu vísindagrein sína um það efni aðeins 17 ára gamall.

Arnþór lauk námi í dýrafræði frá Háskólanum í Bristol á Englandi árið 1962 og doktorsnámi frá Berkley-háskóla í Bandaríkjunum árið 1971. Fjallaði doktorsritgerð hans um stofnsveiflur rjúpunnar en hann dvaldi langdvölum í Hrísey við rannsóknir sínar á efninu.

Arnþór var skipaður prófessor í dýrafræði við Háskóla Íslands í ársbyrjun 1974 og var einn af þeim prófessorum sem unnu brautryðjendastarf við að koma á fót námi í líffræði við skólann. Samhliða kennslu sinnti hann ötullega rannsóknum á fuglalífi í gegnum ævina. Meðal annars rannsakaði hann ítarlega fuglalíf við Mývatn. Í æviágripi sem birtist um Arnþór árið 2010 segir:

„Áhrifa hans gætir víða, m.a. í rannsóknum á fjörudýrum við landið, í rannsóknum á hálendisvistkerfum, Mývatni og fuglabjörgum og eyjum í kringum landið. Ekki síst hafa áhrif hans verið í menntun stórs hóps dýra- og vistfræðinga, sem starfa við Háskóla Íslands og rannsóknastofnanir bæði hérlendis og erlendis. Líffræðin er víðfeðm fræðigrein og eru líffræðingar sérhæfðir á afmörkuðum hluta síns sviðs, t.d. innan vistfræði. Arnþór hefur hins vegar ótrúlega breiða þekkingu og fáir þekkja íslenskt lífríki og náttúru jafnvel og hann. Arnþór býr yfir innsæi og næmi þess sem fylgst hefur með náttúrunni af sjálfsprottnum áhuga allt frá barnsaldri og dáðst að fjölbreytni hennar, og hann er knúinn áfram af löngun til að skýra flókin fyrirbæri hennar og gangvirki. Það er aðalsmerki sannra vísindamanna.“