Héraðsdómur Norðurlands hefur birt manni fyrirkall og ákæru. Er ákæran birt í Lögbirtingablaðinu þar sem ekki hefur tekist að ná í manninn og birta honum ákæruna. Er hann hvattur til að koma fyrir dóm á Akureyri þann 13. október næstkomandi en fjarvist hans verður metin til jafns við að hann viðurkenni að hafa framið brotið sem hann er ákærður fyrir.

Manninum, sem er rúmlega fertugur, er gefið að sök að hafa þriðjudagskvöldið 29. september 2020 verið ölvaður og með óspektir á almannafæri við veitingastaðinn Höllina að Hafnargötu 16, Ólafsfirði, neitað að yfirgefa veitingastaðinn og kastað af sér þvagi yfir tvo bíla á bílastæði fyrir utan veitingastaðinn.

Brotið varðar við áfengislög en 21. grein þeirra hljómar svo: „Hver sá sem sökum ölvunar veldur óspektum, hættu eða hneyksli á almannafæri, opinberum samkomum, í bifreiðum eða öðrum farartækjum eða skipum skal sæta ábyrgð samkvæmt lögum þessum.“

Þess er krafist að maðurinn verði dæmdur til refsingar og til greiðslu alls sakarkostnaðar.