Í fyrradag barst lögreglunni á Suðurnesjum tilkynning vegna erlends ferðamanns sem var búinn að týna dóttur sinni við gosstöðvarnar við Fagradalsfjall. Lögregla mætti á vettvang og fannst stúlkan heil á húfi um það bil 600 metra frá þeim stað sem feðginin höfðu orðið viðskila á. Þetta kemur fram í tilkynningu frá lögreglunni.

Vinnuslys varð í fiskverkunarfyrirtæki í Grindavík í gær þegar starfsmaður sem var að skipta um hnífa í flökunarvél skarst á hendi. Hann var fluttur með sjúkrabifreið á Heilbrigðisstofnun Suðurnesja þar sem skurðurinn var saumaður saman.

Fyrr í vikunni varð annað vinnuslys í Keflavík þar sem eigandi líkamsræktarstöðvar var að vinna að lagfæringum. Hann stóð í stiga sem hallaðist með þeim afleiðingum að maðurinn féll á steypt gólf. Hann fann til eymsla og var fluttur með sjúkrabifreið á HSS.

Ferðamaður var tekinn með kannabisfræ í tveimur boxum í Flugstöð Leifs Eiríkssonar við komuna til landsins í gær. Tollverðir fundu fræin í tösku viðkomandi sem kvaðst hafa keypt þau í Amsterdam í Hollandi og hefði ekki vitneskju um að slíkur innflutningur væri ólöglegur hér. Ferðamaðurinn afsalaði sér fræunum til eyðingar.

Talsvert var um umferðarlagabrot í umdæmi lögreglunnar á Suðurnesjum í vikunni. Í nótt var tekinn úr umferð ökumaður sem grunaður var um fíkniefnaakstur. Sýnatökur staðfestu gruninn. Þá var hann með tól til kannabisvinnslu í bifreið sinni og poka með meintu kannabisefni.

Nokkrir ökumenn til viðbótar voru teknir úr umferð í vikunni vegna gruns um fíkniefnaakstur. Átta ökumenn voru kærðir fyrir of hraðan akstur. Sá sem hraðast ók mældist á 132 km hraða þar sem hámarkshraði er 90 km.