Landspítalinn birti í dag færslu á Facebook sem fjallar um ástandið á blóð- og krabbameinslækningadeildum spítalans. Þrjú Covid-19 smit hafa greinst á deildinni síðustu tvo daga, tvö hjá starfsmönnum og eitt hjá inniliggjandi sjúklingi.

„Að venju hefur farið fram ítarleg rakning og skimun og fólki verið skipað í sóttkví A eða vinnusóttkví eftir atvikum. Viðkomandi sjúklingur greindist við skimun í gær og var fluttur á smitsjúkdómadeild í einangrun og tveir samsjúklingar eru í sóttkví. Ekki er hægt að fullyrða neitt um tengingar þessara smita að svo stöddu, en mögulega er um þrjá aðskilda atburði að ræða,“ segir í færslunni. „Landspítali þakkar sjúklingum, aðstandendum og starfsfólki fyrir samstarf, góðan skilning og þolinmæði undanfarna daga.“

Þar sem fjölmiðlar mega ekki fara inn á spítalann vegna Covid-19 hefur ljósmyndari spítalans, Þorkell Þorkelsson, verið afar duglegur þegar kemur að því að taka myndir af lífinu á spítalanum. „Ljósmyndari Landspítala fangaði stemmninguna á deildinni fyrr í dag þar sem er mikill atgangur, viðbúnaður í takti við það að spítalinn starfar á hættustigi og skörulega gengið til verks,“ segir í færslu Landspítalans en myndirnar sem Þorkell tók má sjá hér fyrir neðan.