Sá sem liggur á gjörgæslu vegna Covid-19 er óbólusettur Íslendingur

Átta einstaklingar liggja nú á Landspítalanum vegna Covid-19 en einn þeirra liggur á gjörgæslu. 5 af þessum einstaklingum voru lagðir inn í gær. Einstaklingarnir eru allir á aldrinum 40 til 70 ára.

Sá einstaklingur sem liggur á gjörgæslu Landspítalans er óbólusettur Íslendingur. Óbólusetti Íslendingurinn sem um ræðir er undir sextugu samkvæmt upplýsingum sem Vísir fékk frá Runólfi Pálssyni, yfirlækni á smitsjúkdómadeild Landspítalans. Hinir 7 einstaklingarnir sem eru á spítalanum eru allir fullbólusettir.

115 einstaklingar greindust í gær með Covid-19 hér innanlands. Af þeim sem greindust í gær voru 89 fullbólusettir, 24 voru óbólusettir en tveir höfðu fengið fyrri sprautu.

Búast má við því að þetta sé ekki lokatala þeirra sem greindust smitaðir í gær þar sem gífurlegur fjöldi mætir í sýnatöku þessa dagana og langan tíma tekur að skila niðurstöðum fyrir alla. Í gær var upphaflega tilkynnt um 82 smit, talan fór síðan upp í 96 en lokatalan, sem gefin var upp síðdegis, reyndist var 123, sem var hæsta tala greindra til þessa í faraldrinum.