Kona ein sem vill ekki láta nafn síns getið lenti í afar óþægilegri lífsreynslu í morgun þegar hún, rétt eins og flesta virka daga, hjólaði í gegnum Naustavog frá Grafarvogi niður í Faxafen, eftir löngum hjólastíg, áleiðis í vinnuna.
Þessar daglegu ferðir konunnar eru ávallt tíðindalausar eins og vænta má en svo var ekki í morgun. Ókunnugur maður stöðvaði ferð hennar og reyndi með valdi að koma í veg fyrir að hún kæmist af stað aftur:
„Maðurinn stendur þarna á hjólastígnum og færir sig ekki, stoppar mig og spyr hvort ég sé með ökuskírteini á þetta hjól og biður mig um að fara af hjólinu. Hann talaði íslensku en með útlenskum hreimi. Ég neita að fara af hjólinu en hann heldur áfram og heldur fast í hjólið mitt og er mjög ógnandi. Ég hótaði að hringja í lögregluna og margsagði honum að sleppa hjólinu mínu. Að lokum tókst mér að sleppa og hjólaði eins hratt og ég gat í burtu. Hugsaði eftir á að hann ætlaði sér örugglega að stela hjólinu mínu, sem er racer-hjól. Hann var grannur, sköllóttur og í brúnni úlpu,“ segir konan.
Aðspurð segir hún að henni hafi verið mjög brugðið. Hún tilkynnti atvikið til lögreglu í morgun og gaf þar greinilega lýsingu á manninum. Málið er í rannsókn hjá lögreglu en konan hefur ekki upplýsingar um hvernig rannsókninni miðar.