Héraðsdómur Reykjavíkur dæmdi í dag karlmann í átta mánaða fangelsi fyrir röð vopnaðra rána í apótekum á höfuðborgarsvæðinu á nokkurra daga tímabili nú fyrr á árinu.

Þann 10. mars réðst maðurinn í félagi við annan mann inn í apótek og hótaði starfsmanni þar með hamri og krafðist þess að fá Oxycontin. Apótekarinn henti yfir afgreiðsluborðið einni pakkningu af lyfinu sem árásarmaðurinn hafði á brott með sér. Söluverðmæti pakkningarinnar voru heilar 7.158 krónur, að því er segir í dómnum.

Síðar þá sömu viku, 13. mars, réðst sami maður á annað apótek þar sem hann veittist með ofbeldi að starfsmanni apóteksins. Segir í dómnum að hann hafi gripið í konuna, haldið upp að henni hníf og krafist þess að fá afhent lyfseðilsskyld lyf. Hafði maðurinn nokkrar töflur af Rítalíni og nokkur hundruð töflur af Oxycontin á brott með sér.

Enn lét maðurinn svo á sér kræla þann 16. mars en þá var hann handtekinn vopnaður hnífi í enn einu apótekinu. Maðurinn var úrskurðaður í gæsluvarðhald degi síðar, þann 17. mars.

Maðurinn játaði sök fyrir dómi undanbragðalaust og var það metið manninum til refsilækkunar og þótti átta mánaða fangelsi hæfilegt. Til frádráttar þeirri refsingu kemur gæsluvarðhaldsdvölin sem maðurinn sætti.