Skömmu fyrir klukkan 17.00 í gær var tilkynnt um rán í Laugardalshverfi. Þar höfðu þrír aðilar ráðist á aldraðan einstakling með bareflum og stolið ýmsum munum af honum. Þeir brutu gleraugu hans og börðu til óbóta. Lá maðurinn í blóði sínu er lögreglan kom á vettvang. Vitað er hverjir voru að verki.

Skömmu fyrir klukkan 17.00 var ekið á reiðhjólamann í Kópavogi. Hann meiddist óverulega en hjálmurinn sem hann var með bjargaði miklu.

Um klukkan 16.30 í gær var maður handtekinn í verslun í Árbæ en þar hafði hann verið með hótanir og yfirgang við viðskiptavini og starfsfólk. Hann var vistaður í fangageymslu.

Á sjöunda tímanum var tilkynnt um ökumann sem hafði dælt bensíni á bifreið sína en tók bensíndæluna ekki úr bifreiðinni áður en hann ók af stað. Ökumaðurinn reyndist vera undir áhrifum fíkniefna. Tveir ökumenn til viðbótar voru handteknir síðdegis í gær. Annar er grunaður um að hafa verið undir áhrifum lyfja og hinn um að vera undir áhrifum fíkniefna auk þess sem hann reyndist vera sviptur ökuréttindum.