Félag namibískra fjölmiðlamanna (NAMPU) hefur gefið út yfirlýsingu þar sem hátterni Samherja gegn RÚV og Helga Seljan er fordæmt. Eins er hvatt til þess að fjölmiðlamenn um heim allan, einkum í Evrópu, stígi fram og styðji við kollega sína á Íslandi.

Í yfirlýsingunni segir:

„Síðan fréttir bárust í nóvember 2019 af stærsta spillingarskandal Namibíu – Samherjamálinu – sem háttsettir stjórnmálamenn, og stór fyrirtæki voru flækt í, hafa íslenskir fjölmiðlamenn sem unnu að umfjölluninni á Íslandi þurft að eiga við herferð af einelti og áreitni.“

Er þar vísað til fjölda myndskeiða og yfirlýsinga sem Samherji hefur staðið fyrir undanfarin misseri. Nú síðast birtist auglýsing á besta stað á mbl.is þar sem Samherji hjólaði í RÚV. Eins minnir NAMPU á það að Helgi Seljan hafi orðið fyrir beinni áreitni, en eins og flestir vita áreiti Jón Óttar Ólafsson, starfsmaður Samherja, Helga um nokkurt skeið meðal annars með því að sitja fyrir honum á kaffihúsum og senda honum ítrekað skilaboð.

NAMPU segir allt þetta gert til að þagga umfjöllunina um Samherjamálið niður

„Íslenska fyrirtækið sem er þungamiðjan í þessum spillingar ásökunum, Samherji, hefur beitt ýmsum aðferðum til að ógna fréttamönnum, til dæmis með upplýsingaóreiðu, áróðursmyndböndum og jafnvel með beinni áreitni, allt í þeim tilgangi að þagga niður ásakanirnar um meinta spillingu fyrirtækisins í Namibíu.

NAMPU fordæmir hátterni Samherja hvað þetta varðar og skorar á fyrirtækið að hætta að áreita blaðamennina sem fjalla um Samherjamálið.

Fyrirtækið, þrátt fyrir að hafa rétt á að svara fyrir sig, á ekki að leitast við því að þagga niður opinbera umræðu um hlut þeirra í Samherjamálinu. 

Við stöndum með kollegum okkar á Íslandi sem hafa orðið fórnarlömb ógnana og áreitni Samherja allt vegna vinnu þeirra við Samherjamálið. 

Þar að auki köllum við eftir því að vinnuveitendur blaðamanna sem og yfirvöld sem hafa með fjölmiðlafrelsi að gera á Íslandi, geri sitt besta til að tryggja það að fjölmiðlar geti unnið í þágu almennings með því að koma upp um spillingu. 

Að lokum hvetjum við blaðamenn um allan heim, sérstaklega í Evrópu, til að styðja við kollega sína á Íslandi og fordæma ógnandi hátterni einkaaðila. „