Egill Páll Egilsson telur að íslenskir ferðamenn hafi gengið fram af starfsfólki í ferðaþjónustu síðasta sumar með yfirgengilegri frekju. Þetta kemur fram í grein á vefnum vef Vikublaðsins sem ber yfirskriftina „Martröðin sem ekki er talað um“.

Vegna Covid ferðuðust Íslendingar meira innanlands en árin þar á undan. Egill segir að framkoma þeirra hafi verið með þeim hætti að veki kvíða hjá starfsfólki í ferðaþjónustu fyrir komandi sumri. Um þetta sé hins vegar ekki talað. Segir hann að starfsfólk hótela hafi grátið undan frekum íslenskum ferðamönnum:

„Ferðasumrinu 2020 var bjargað af ferðaþyrstum Íslendingum sem tilneyddir þurftu að ferðast innanlands með peningana sem annars hefðu farið í hanastél á Tene; en mikill fjöldi Íslendinga ferðaðist um Norðurland. Eigendur veitinga og gististaða sögðust enda ánægðir með afkomuna miðað við ástandið.

Undir niðri kraumaði þó sannleikur sem enginn þorði að segja upphátt. Sannleikur sem nú nærir ótta þjónustufólks. Svo virðist nefnilega vera sem of stór hluti Íslendinga gleymi öllum mannasiðum um leið og það setur niður í ferðatösku. Starfsfólkið sem hafði það hlutverk að þjónusta þurftafreka Íslendinga hefur aldrei kynnst öðru eins álagi eins og síðasta sumar. Það er með ólíkindum framkoma sumra íslenskar ferðamanna. Yfirmenn hótela og veitingastaða þurftu ítrekað að veita grátandi starfsfólki sínu áfallahjálp eftir vaktir, sérstaklega um helgar. Verst var framkoman í garð erlends starfsfólks. Dæmi voru um að Íslendingar hreiðruðu um sig á hótellobbíum með sínar eigin áfengisbyrgðir, djömmuðu fram í roða; og virtu að vettugi öll tilmæli starfsfólks.“

Egill segir að frekir íslenskir ferðamenn hafi líka skammað starfsfólk á bensínstöðvum og í bakaríum. Útlenskir starfsmenn hefðu verið niðurlægðir fyrir að kunna ekki fullkomna íslensku.

Egill segir:

„Það að greiða fyrir þjónustu gefur ekki frípassa á að haga sér eins og fífl. Virðing og kurteisi kostar ekkert en hagnaðurinn er ómetanlegur. Verum góð við hvert við annað.“