Lyfjastofnun hefur birt tilkynningu þar sem áréttað er að heilsíðuauglýsing í Morgunblaðinu í dag þar sem hvatt er til að kynna aukaverkanir af bólusetningum með bóluefnum við Covid-19 til Lyfjastofnunar séu ekki frá stofnuninni komnar.

Enginn er merktur fyrir auglýsingunni en undirskriftin er: „Við erum öll Almannavarnir“

Ennfremur segir Lyfjastofnun að upplýsingar í auglýsingunni um hugsanlegar aukaverkanir séu villandi. Segir þar meðal annars að bólusetningar geti valdið blindu og lömun.

Rúna Hauksdóttir Hvannberg, forstjóri Lyfjastofnunar, segir grafalvarlegt að í auglýsingunni birtist upplýsingar um aukaverkanir sem séu óstaðfestar eða jafnvel kolrangar. Kemur þetta fram á mbl.is.

„Þær at­huga­semd­ir sem við ger­um er auðvitað í fyrsta lagi að það er verið að láta líta út fyr­ir að þetta séu ein­hver yf­ir­völd sem eru að aug­lýsa þarna, sem er ekki nátt­úru­lega. Árvak­ur [út­gáfu­fé­lag Morg­un­blaðsins] verður auðvitað að bera ein­hverja ábyrgð á þessu, vegna þess að þarna er verið að blása upp ein­hvern hræðslu­áróður,“ segir Rúna.

https://www.facebook.com/lyfjastofnun/posts/3758000704325842