Leifur S. Garðarsson hefur óskað eftir því að láta af störfum sem skólastjóri Áslandsskóla í Hafnarfirði. Mbl.is greinir frá. Unnur Elva Guðmundsdóttir aðstoðarskólastjóri mun sinna starfi skólastjóra til 1. ágúst eða þar til nýr skólastjóri hefur verið ráðinn.
DV greindi fyrst frá því í lok janúar í ár að körfuboltadómara hafi verið vikið úr starfi fyrir að hafa sent smáskilaboð á kvenkyns leikmann eftir að hafa dæmt leik hjá henni. Leikmaðurinn sendi inn kvörtun til KKÍ og var hann tekinn af lista yfir tiltæka dómara í leikjaniðurröðun sambandsins.
Við þessa umfjöllun DV stigu fleiri konur fram og sögðu svipaðar sögur úr körfuboltaheiminum. Fanney Lind Thomas, leikmaður Breiðabliks, var ein þeirra sem stigu fram og sagði á Twitter-síðu sinni að þessi hegðun hefði verið við lýði í mörg ár innan hreyfingarinnar.
Í febrúar var Leifur kominn í veikindaleyfi vegna þessara ásakana og var hann í því allt til dagsins í dag.
