Ný gossprunga hefur opnast norð-austan megin við gosstöðvarnar í Geldingadölum. Nýja sprungan er um 500 metra löng og er um 500 metra frá fyrri gosstöðvum. Þetta kemur fram í tilkynningu á Veðurstofu Íslands.
Í tilkynningunni segir að Veðurstofu hafi borist tilkynningar frá flugmönnum og flugturni í Keflavík rétt um hádegi varðandi nýju sprunguna.
Í tilkynningu frá lögreglunni á Suðurnesjum kemur fram að gosstöðvunum hafi verið lokað vegna sprungunnar
„ÁRÍÐANDI TILKYNNING:Svæðinu við gosstöðvarnar hefur verið lokað vegna nýrrar sprungu sem var að opnast. Frekari upplýsingar síðar.“
Vefmyndavél RÚV hefur verið snúið að nýju sprungunni.
