Svala Jóhannesdóttir er nýjasti gestur hlaðvarpsins Það er von. Svala hefur starfað með heimilislausu fólki í Reykjavík og einstaklingum sem glíma við þungan vímuefnavanda í 14 ár. Hún hefur meðal annars stýrt tveimur skaðaminnkunarúrræðum, Frú Ragnheiði á höfuðborgarsvæðinu og Konukoti, athvarfi fyrir heimilislausar konur.

Í þættinum segir Svala meðal annars frá uppvaxtartímum á Reykjanesinu þar sem hún upplifði snemma að það fengu ekki allir sömu tækifærin í lífinu, hún segir frá því hvernig hún fékk að heimsækja föður sinn á áfangaheimili og hversu dýrmæt lífsreynsla það var og hvað það mótaði hana.

Svala hefur heimsótt fjölmörg skaðaminnkandi úrræði erlendis og innleitt skaðaminnkandi inngrip hér á landi. Svala er menntuð í félagsfræði og fjölskyldumeðferðarfræði. Hún starfar í dag sjálfstætt, meðal annars við að veita fólki skaðaminnkandi meðferð, aðstandendum fjölskyldumeðferð og heldur námskeið og fræðslur.

Það er von samtökin hafa einsett sér að vinna markvisst gegn skömm og fordómum gagnvart fólki sem á við fíknivanda að stríða og eru með hátt í 22.000 fylgjendur á samfélagsmiðlum.