Þrír greindust innanlands með Covid-19 í gær og voru þeir allir utan sóttkvíar. Þetta kemur fram í nýjum tölum á Covid.is.

Einn er nú á sjúkrahúsi og 93 í einangrun og hafði þeim fækkað á milli daga.

Sjö greindust á landamærunum og voru þrír með virkt smit í fyrri skimun. Beðið er eftir mótefnamælingu vegna tveggja greininga.

Nýgengi smita lækkar þrátt fyrir smitin í dag og er nú 16,1.

Svandís Svavarsdóttir heilbrigðisráðherra situr nú ríkisstjórnarfund í ráðherrabústaðnum við Tjarnargötu þar sem hún mun kynna fyrir ríkisstjórn tillögur Þórólfs Guðnasonar sóttvarnalæknis um breytingar á samkomutakmörkunum hér á landi. Gildistími núgildandi reglugerðar rennur út á fimmtudag, og má því reikna með að ný reglugerð taki gildi í síðasta lagi þá.

Þórólfur hefur látið hafa eftir sér í fjölmiðlum undanfarna daga að tilslakanir séu líklegar, en efni tillagnanna hafa ekki komið fram.