Frestað verður bólusetningum með Janssen-bóluefni Johnson & Johnson vegna tilkynninga frá Bandaríkjunum um blóðtappa. Sex konur á aldrinum 18-48 ára hafa fengið blóðtappa eftir bólusetningu þar í landi.
Þórólfur Guðnason sóttvarnalæknir segir í samtali við Vísi að beðið verði með það að nota bóluefnið þar til betri upplýsingar séu til staðar. Ekki er víst hversu lengi beðið verður.
Von er á 4.800 skömmtum af bóluefni Janssen í mánuðinum. Aðspurður segir Þórólfur að þetta gæti sett strik í reikninginn varðandi bólusetningar.
„Ef niðurstaðan verður sú að það verður ekki ráðlagt að nota bóluefnið mun það svo sannarlega gera það. Ég vona að það verði ekki nein töf þó við stoppum notkunina í einhverjar vikur. Ef endanlega niðurstaðan verður hins vegar sú að það sé ekki þorandi að nota bóluefnið mun það setja strik í reikninginn,“ segir Þórólfur.
„Þetta með Janssen eru ekki góðar fréttir,“ sagði Svandís Svavarsdóttir í viðtali á Rás 2 rétt í þessu. Ekki er vitað hvenær niðurstöður rannsókna liggja fyrir svo hægt sé að byggja ákvörðun um að heimila notkun á lyfinu.
