Bandaríkin mæla með að gert verði hlé á bólusetningu með Janssen-bóluefninu frá Johnson & Johnson eftir að hættulegur blóðtappi greindist hjá nokkrum konum sem þáðu bólusetningu með efninu. AP News greinir frá.
Von er á fyrstu sendingu af bóluefninu frá Johnson & Johnson hingað til lands eftir þrjá daga en aðeins einn skammt af því þarf til að fullbólusetja einstakling gegn Covid-19.
Þeir sem þiggja bólusetningu frá Bandaríska alríkinu fá ekki lengur Janssen-bóluefnið og líklegt er að þau fylki sem hafa boðið upp á það muni einnig hætta því á næstunni. Meira en 6,8 milljón skammtar hafa nú þegar verið gefnir íbúum landsins.
Rúna Hauksdóttir Hvannberg, forstjóri Lyfjastofnunar, segir í samtali við DV að málið sé ekki komið á borð til þeirra en verði skoðað af Lyfjastofnun Evrópu. Þar er öllum gögnum um svipuð mál safnað og fyrirmæli gerð. Það er síðan undir heilbrigðisyfirvöldum hér á landi komið að ákveða hvort byrjað verði að bólusetja með efninu eða hvort beðið verði með það.
