Drottningarmaðurinn, Filippus prins, hertogi af Edinborg, verður jarðaður sunnudaginn 17. apríl næstkomandi. Prinsinn er í breskum fjölmiðlum sagður hafa óskað eftir látlausri athöfn. Breska konungsfjölskyldan er háð Covid-19 samkomutakmörkunum eins og aðrir og verður gestalisti athafnarinnar því takmarkaður við 30 einstaklinga. Forsætisráðherrann, Boris Johnson, mun ekki vera viðstaddur.

Harry Bretaprins, sonarsonur Filippusar, sem nýverið sagði skilið við konungsfjölskylduna og fluttist vestanhafs með eiginkonu sinni, leikkonunni Meghan Markle, mun mæta í jarðarförina. Í tilkynningu frá Buckinghamhöll kemur þó fram að Meghan Markle muni ekki vera viðstöd þar sem 12 tíma flug frá Los Angeles til London gæti reynst henni erfitt. Meghan er eins og DV hefur sagt frá, ófrísk og mun fæða þeim hjónum barn í byrjun sumars.

Filippus var 99 ára gamall er hann lést í vikunni. Hann hefði orðið 100 ára í júní á þessu ári.

Ferð Harrys til Bretlands verður fyrsta heimsókn Harrys í höllina eftir að hann og Meghan fluttu til Bandaríkjanna fyrir ári síðan. Þetta verður jafnframt í fyrsta sinn sem fjölskyldan kemur saman eftir viðtalið fræga við Oprah Winfrey, þar sem hjónin sögðu meðlimi fjölskyldunnar í Buckinghamhöll meðal annars hafa óttast að barn þeirra Harrys og Meghan yrði „of dökkt.“

Samkvæmt heimildum Page Six um málið er Harry miður sín yfir andláti afa síns. Þeir eru sagðir hafa verið mjög nánir. „Hann mun mæta, sama hvað hefur gengið á innan fjölskyldunnar, hann mun mæta,“ sagði einn heimildarmaður Page Six í gær.

Uppfært 11:30: Í fyrri útgáfu fréttarinnar var Harry sagður dóttursonur Filippusar. Hið rétta er auðvitað að Harry er sonur Karls og Díönu, og því vafalaust frægasti sonarsonur veraldar. DV biður royalista um víða veröld afsökunar á þessum fljótfærnismistökum.