Líkt og DV greindi frá í gær verður Cocoa Puffs og Lucky Charms ólöglegt við gildistöku nýrrar Evrópureglugerðar. Reglugerðin var sett í maí 2019 og hefur tekið gildi í þrepum. Síðasta þrepið verður svo stigið á mánudaginn eftir helgi.
Í frétt DV sagði í gær:
General Mills hefur nýlega upplýst Nathan & Olsen um að vörumerkin Cocoa Puffs og Lucky Charms séu ekki lengur í boði fyrir íslenskan markað. Þetta kemur til vegna breytinga á uppskrift sem felur í sér viðbætt náttúrulegt litarefni sem samræmist ekki evrópulöggjöf sem gildir á Evrópska efnahagssvæðinu.
Haft var eftir Lísu Björk Óskarsdóttur að morgunkornin sem um ræddi hefðu átt sér fastan sess á heimilum landsmanna um áratuga skeið og notið mikilla vinsælda fólks á öllum aldri. „Þetta er auðvitað mjög leiðinlegt fyrir okkur og íslenska neytendur.“
General Mills, framleiðandi morgunkornanna tveggja, hefur sagt að verið sé að vinna að því hörðum höndum að skipta út ólöglegu litarefnunum svo hægt sé að hefja sölu hér á landi á ný.
Á meðan er ljóst að birgjar og endursöluaðilar munu sitja uppi með gríðarlegan lager af bæði Cocoa Puffs og Lucky Charms.
Aðspurður hvað verður um þann lager segir Felix Skarphéðinsson, vörumerkjastjóri að í ljósi páskanna verði ómögulegt að losa hann út með hefðbundnum leiðum. Það sé því ekki annað í stöðunni en að gefa hann. „Það er skírdagur í dag, svo föstudagurinn langi, svo páskahelgi,“ útskýrir Felix.
Hægt verður að nálgast pakkanna í þjónustuveri innflytjandans á Korputorgi í dag til 15:00 og á Glerártorgi á Akureyri til 14:00. „Ef fólk vill þetta getur það komið og fengið þetta,“ segir Felix. „Þökkum svo ESB innilega fyrir,“ segir hann að lokum í hæðnistón.
