Bílstjóri sem var staddur á Reykjanesbraut, á mörkum Kópavogs og Breiðholts, tók meðfylgjandi mynd og hafði samband við ritstjórn. Gífurleg umferðarteppa myndaðist á svæðinu um þrjúleytið í dag.
Bílstjórinn sá tvo bíla mjög illa farna eftir árekstur, en að auki samtals fjóra bíla úti í kanti, sem erfitt var að henda reiður á hvort hefðu lent í árekstrinum.
„Umferðin er í algjöru fokki út af þessu. Við vorum 10 mínútur að komast 200 metra,“ sagði maðurinn við DV.
Skömmu síðar sagði maðurinn að ein akrein af þremur væri laus á kaflanum og lögreglan stýri þar umferð í gegn með hléum. Tókst honum að komast úr hnútnum eftir um 20 mínútur en sumir hefðu beðið lengur.
Ekki náðist samband við lögreglu vegna málsins.
Annar bílstjóri úr umferðarteppunni hafði sambandi, en viðkomandi tók myndina að ofan. Segir hún að einhver virðist hafa slasast í árekstrinum því sjúkrabörur voru á vettvangi.
Samkvæmt frétt mbl.is var einn fluttur á slysadeild. Enn liggur ekki fyrir hvernig slysið kom til. Samkvæmt sömu rétt rákust samtals sex bílar saman. Það rímar við lýsingar sjónarvotta við DV sem segjast hafa séð tvo bíla illa farna og fjóra bíla úti í kanti, lítið skemmda.
