Heilbrigðiseftirlit Reykjavíkur hefur lagt dagsektir á eiganda lóðarinnar við Leifsgötu 4b. Ítrekað hefur verið farið fram á að eigandinn hreinsi lóðina. Á henni eru timbur, málmur, plast og annar úrgangur sem er lýti fyrir umhverfið og veldur hljóðmengun segir í bréfi Heilbrigðiseftirlitsins til lóðareigandans.

Fréttablaðið skýrir frá þessu. Fram kemur að þeir nágrannar sem Fréttablaðið ræddi við hafi verið sammála um að lítil prýði sé af því fyrir hverfið að hafa hjólhýsi eða gúmmíbát í portinu.

Í bréfi Heilbrigðiseftirlitsins segir að farið hafi verið í eftirlitsferð 27. október og aftur 30. nóvember til að kanna hvort búið væri að hreinsa ruslið. Þá hafi aðeins verið búið að hreinsa hluta af lausamunum og úrgangi.

Enn á ný var kvartað í febrúar og var þá aftur farið í eftirlitsferð. „Enn var ekki búið að hreinsa lóðina, þvert á móti var búið að bæta úrgangi og lausamunum við. Á lóðinni mátti finna fjórar til sex þvottavélar ásamt vélarhlut úr þvottavél, ísskápa, lítinn bát, járnagrindur, dekk, slöngur, timbur, plast og annan almennan úrgang,“ segir í bréfinu.

Var eigandanum þá veittur lokafrestur til 17. febrúar. Nú er mælirinn greinilega orðinn fullur og því hafa dagsektir verið lagðar á eigandann.