Skiptum er lokið í þrotabúi ferðaþjónustufyrirtækisins Austur Vestur ehf. sem hafði aðsetur í Hafnarfirði. Félagið var tekið til gjaldþrotaskipta þann 15. október 2020.

Engar eignir fundust í búinu en lýstar kröfur voru rúmlega 111 milljónir króna, samkvæmt tilkynningu í Lögbirtingablaðinu. Fékkst ekkert upp í þær kröfur.

Austur Vestur sérhæfði sig í útsýnisferðum í rútum fyrir erlenda hópa. Eigandi fyrirtækisins, Gestur Steinþórsson, segir í samtali við DV að kórónuveirufaraldurinn hafi leikið fyrirtækið grátt en vandræðin hafi þó byrjað með gjaldþroti WOW í mars 2019:

„Þetta byrjaði þegar WOW fór á hliðina, þá byrjaði mjög þungur róður. Þá stöðvuðust greiðslur frá endursöluaðilum. Einnig fórum við að finna fyrir Covid löngu áður en farbönn voru sett á, í desember 2019 urðu afbókanir hjá kínverskum ferðaskrifstofum og janúar og febrúar 2020 voru hörmung, þá var öllu aflýst frá Asíu. Vendipunkturinn hvað Covid varðar var þegar Trump setti farbannið á, þeir örfáu ferðamenn sem voru á landinu fóru þá í sínar ferðir og svo var það bara búið, eins og skrúfað væri fyrir krana.“

Gestur segist ekki eiga von á því að ferðaþjónustan verði aftur með svipuðu sniði og hún var fyrir faraldurinn. „Mér sýnist að þegar þetta byrjar aftur þá byrji það smátt miðað við hvernig þetta var. Þó að hingað komi tugir eða hundruð þúsunda erlendra ferðamanna þá eru samt bara þessir stóru aðilar sem hafa haft efni á að fara í greiðsluskjól og nýta sér önnur slík úrræði sem verði tilbúnir að taka við ferðamönnum.“

Gestur telur að ferðamennska almennt muni breytast. „Ég á vona á að heimurinn verði öðruvísi eftir Covid. Spritt alls staðar og fólk vart um sig varðandi fjarlægðir við aðra. Hvað varðar Ísland sem áfangastað þá gæti ég trúað því að massatúrisminn sé liðinn undir lok. Þetta verða meira einstaklingar, pör og smærri hópar. Fólk í auknum mæli á eigin vegum sem leigi sér bílaleigubíla eða þessa Campers-bíla sem voru mjög vinsælir. Það verður minna um hópa sem fylla stórar rútur.“

Aðspurður segist Gestur ekki hyggja á frekari ferðaþjónusturekstur heldur einbeita sér að  öðrum verkefnum í framtíðinni.