„Þetta er alveg ótrúleg upplifun,“ segir Jón Kristjánsson sem dvaldi í vélarlausum Baldri á miðjum Breiðafirði í nótt. Jón er sölumaður og var á leið heim til sín úr söluferð til Vestfjarða þegar allar leiðir að vestan lokuðust vegna ófærðar á heiðum og neyddist Jón því til að taka Baldur yfir Breiðafjörð.
Þegar um klukkutími var eftir af siglingunni kom upp bilun í einu aðalvél Baldurs sem varð til þess að skipið rak vélarvana um Breiðafjörð sem er einmitt þekktur fyrir fjölda skerja og eyja. Jón segist ekki hrifinn af siglingum yfir höfuð og ekki treysta sjónum. Upplifunin í nótt hafi því síður en svo verið skemmtileg.
„Þetta var mjög skugglegt í nótt,“ segir Jón. „Maður var ekkert viss um hvernig þetta var, maður hefur enga reynslu í þessu.“
Jón segir málið vera hinn versta skandal enda í annað sinn á stuttum tíma sem þetta gerist, þ.e. að Baldur missi vélarafl á ferð sinni með farþega. „Það er bara eins og menn hafi ekkert lært neitt af fyrra skiptinu. Þetta skip er alveg jafn ósjálfbjarga og síðast. Þetta er ámælisvert og ekki bjóðandi fyrir fólkið sem þarf að nota þetta. Skipið skerðir lífsgæði fólks hér á landi sem borgar þó sína skatta eins og aðrir,“ segir Jón ákveðinn og segir samgönguráðherra hafa gert sig sekan um sinnileysi. „Þetta er fáránlegt, ef ég á að segja eins og er.“
Fram hefur komið að um borð hafi verið um 20 farþegar auk 10 manna áhafnar. Jón segir að áhöfnin hafi staðið sig hetjulega í framgöngu sinni og stjanað við fólkið um borð. „Það er ekki hægt að setja neitt út á henanr störf. Það var búið að gefa fólki að borða um borð og í raun gefa þeim allt sem það vill.“
Fram kom í fréttum í gær að farþegum hefði verið boðið að vera sótt og ferjað í land af þyrlu Landhelgisgæslunnar. Jón kannast ekkert við að hafa fengið slíkt boð. „Hún kom bara eins og þruma úr heiðskíru lofti þessi frétt. Að því sögðu þá er ekkert víst að maður hefði treyst sér í eitthvað þyrlutog. Eftir sem áður var okkur ekki boðið þetta og ekkert tilkynnt um það.“
Þegar DV náði tali af Jóni var togbátur með Baldur í togi og var að „æfa sig“ í að stýra Baldri. „Hann er svona að æfa sig að beygja bátnum og stjórna skipinu,“ útskýrði hann. Hann segir veðrið hafa skánað til muna. „Það er svona ágætt. Smá kuldi og smá vindur, en ekkert eins og í gær. Við vöknuðum í morgun við það að þetta ætti að fara að gerast, en við erum hér enn.“
„Við erum bara rétt fyrir utan innsiglingunni í höfninni og ég horfi hérna inn á Hólminn,“ sagði Jón, sem er einn á ferð á sínum bíl. Í þeim töluðu orðum flaug þyrla Landhelgisgæslunnar yfir hann sem Jón sagði að sé vonandi fyrirboði um að eitthvað sé að fara að gerast.
Jón segir nóttina hafa verið óþægilega. Ekki reyndust nægilega margar kojur fyrir alla. „Það er svolítið af eldra fólki og fólk með börn og maður leyfði þeim að ganga fyrir,“ segir Jón sem sjálfur svaf á bekk í nótt. Fólkið hafði þó aðgang að innstungum og interneti, sem hefur líkast til gert biðina bærilegri. Myndir af náttstað Jóns auk fleiri mynda og myndbanda sem hann tók fylgja hér með að neðan.
Uppfært kl. 14:15: Jón segir að ferjan hafi nú rétt eftir birtingu fréttarinnar lagst að bryggju við Stykkishólm.
