Erlendur maður var fyrir helgi dæmdur í 60 daga fangelsi fyrir að ráðast á starfsmann á N1 bensínstöð á Ísafirði.
Árásin var gerð í júní í fyrra en ákæra var birt manninum í Lögbirtingablaðinu í síðasta mánuði. DV fjallaði þá um málið og í fréttinni sagði:
„Lögreglustjórinn á Vestfjörðum hefur ákært mann fyrir líkamsárás. Er maðurinn í ákærunni sagður hafa ráðist á bensínafgreiðslumann á N1 stöðinni á Ísafirði í júní í fyrra.
Í ákærunni segir að hinn ákærði hafi veist að afgreiðslumanninum, þrifið í peysu hans og tekið hann hálstaki með þeim afleiðingum að hann hlaut eymsli á vinstri hendi og framhandlegg, hruflsár á hendi og meiðst á hálsi. Þá er maðurinn jafnframt ákærður fyrir brot á fíkniefnalögum fyrir að hafa haft á sér 0,39 grömm af maríhúana, sem fundust við leit á heimili ákærða á Ísafirði.
Ákæran er birt í Lögbirtingablaðinu þar sem ekki hefur tekist að birta manninum ákæruna. Má því ætla að maðurinn búi ekki lengur á Ísafirði.
Fórnarlamb árásarinnar gerir þá kröfu að ákærði greiði sér eina og hálfa milljón í miskabætur vegna árásinnar. Lögreglan á Vestfjörðum krefst þess að maðurinn verði dæmdur til refsingar og að hann greiði sakarkostnað.“
Maðurinn mætti ekki fyrir dóm og ekki hefur tekist að birta honum ákæru. Talið er að hann hafi farið úr landi.
Nægilegt þótti, að virtri fjarvist sakborningsins, til sönnunar sektinni, framburður þolandans og áverkavottorð. Var því útlendingurinn, sem fyrr segir, dæmdur í 60 daga fangelsi. Fátt bendir hins vegar til að hann gisti fangageymslur á næstunni, ekki nema hann komi þá aftur til landsins.
Skaðabætur til starfsmanns N1 voru hins vegar dæmdar miklu lægri en krafan hljóðaði upp á, eða 200 þúsund krónur. Einnig á árásarmaðurinn að greiða honum tæpar 200 þúsund krónur í lögmannskostnað. Ekki er óhætt að spá því að árásarmaðurinn greiði þessar kröfur á næstunni.