Þórólfur Guðnason, sóttvarnalæknir var gestur Reykjavík síðdegis á Bylgjunni í dag. Þar var hann spurður út í háværan orðróm sem gengið hefur á milli manna seinustu daga, um að okkur myndu berast skammtar á næstu vikum til að bólusetja mest alla þjóðina.

Þórólfur segist ekki vita hvaða orðrómurinn kemur en segir að hann sé í samskiptum við Pfizer og að hann eigi fund með þeim í næstu viku. Ekki tók hann fram um hvað fundurinn snýst en segist vera að bíða eftir samningsdrögum.

Hann tekur fram að ekki sé víst að samningurinn eða samningsdrögin verði ásættanleg og að það þurfi bara að taka afstöðu þegar kemur að því. Um leið og málið sé komið í höfn fái allir að vita hvað gerist.