Samkvæmt áreiðanlegum heimildum DV hefur albanskur maður, sem grunaður er um að hafa skotið Armando Bequiri til bana fyrir utan heimili hans í Rauðagerði, laugardagskvöldið 13. febrúar, neitað sök. Segist hann ekkert hafa haft með morðið að gera.

Maðurinn er Albani á fertugsaldri, búsettur hér á landi. Hann gaf sig fram við lögreglu síðastliðið þriðjudagskvöld.

Tvær kenningar eru á lofti um orsök morðsins. Önnur er sú að það tengist uppgjöri í undirheimum og tilræðið hafi verið fyrirskipað. Hin er sú að um hafi verið að ræða persónulega óvild milli tveggja manna. Umræddur maður kannast ekki við að tengjast neinu slíku, hvorki undirheimauppgjöri né hafa borið óvildarhug til hins látna.

Samkvæmt öðrum heimildum DV hefur lögregla meðal annars sóst eftir snjallsímum og öðrum tæknibúnaði í víðtækum húsleitum sem gerðar hafa verið í rannsókninni. Ekki liggur fyrir hvort henni hafi tekist að afla þeirra gagna sem hún leitar eftir. Samkvæmt frétt Vísis í dag er unnið að því að kortleggja ferðir manna sem eru í varðhaldi vegna málsins út frá farsímagögnum.

Vænta má fréttatilkynningar frá lögreglu um málið á morgun en hún verst enn allra frétta af rannsókninni í dag.