Dagbjört Ósk Jónsdóttir er á listnámsbraut Verkmenntaskólans á Akureyri en hún missti sjónina á hægra auga 11 ára gömul. Innan við tveimur árum seinna hafði hún misst allt að 80% sjón á hinu auganu líka.
Ástæðan er afar sjaldgæfur sjúkdómur sem kallast Chronic relapsing inflammatory optic neuropathy eða CRION.
Dagbjört Ósk var í viðtali í Fréttavaktinni á Hringbraut í gær þar sem hún ræddi sjúkdóminn og námið sitt. Viðtalið má sjá í myndbandinu hér að neðan.
Það tók hana aðeins um tvo til þrjá daga að missa sjónina á hægra auga. Hún segir sjúkdóminn afar sjaldgæfan, og árið 2016 hafi til að mynda aðeins verið vitað um 120 manns í öllum heiminum með þennan sjúkdóm. Þá fái fólk CRION yfirleitt um eða eftir þrítugt, en hún byrjaði að missa sjón strax ellefu ára gömul.
Dagbjört Ósk er nú sextán ára gömul og nýtur sín í listnámi. Hún segist hafa byrjað að teikna sér til gamans um það leyti sem hún var að byrja í grunnskóla en fór að taka því af meiri alvöru á svipuðum tíma og hún missti sjónina.
Í skólanum teiknar hún mest á blöð en heima við notast hún við spjaldtölvu og finnst það í raun betra því þá getur hún þysjað inn til að sjá betur. Teikningar í meðfylgjandi myndbandi eru eftir Dagbjörtu.
