Lögreglan á höfuðborgarsvæðinu hefur sent út tilkynningu þar sem vegfarendur eru varaðir við flughálku. Í tilkynningunni kemur fram að ökutæki og starfsmenn borgarinnar sem sjá um söltun hafi átt erfitt með að athafna sig vegna hálkunnar í morgun.

Að öðru leyti var gærkvöldið og nóttin tíðindalítil hjá lögreglu. Tilkynnt var um slagsmál í miðbæ Reykjavíkur rétt fyrir miðnætti þar sem einn aðili var handtekinn á vettvangi. Þá olli ölvaður maður skemmdum á sameign í fjölbýlishúsi og var vistaður í fangklefa vegna ástands síns.

Þá tilkynnti leigubílsstjóri um farþega sem neitaði að greiða fargjaldið og reyndi að hlaupa á brott en komst ekki undan laganna vörðum.