„Enginn þeirra aðila sem hafa eftirlit með starfsemi skólans hafa þó gert alvarlegar athugasemdir við starfsemi leikskólans, aðstöðu eða aðbúnað barna, starfskjör starfsmanna eða annað sem teljast mætti ámælisvert,“ segir Lilja Margrét Olsen lögmaður, sem gætir hagsmuna Leikskólans Sælukot. Þetta kemur fram á Vísir.is.
Fyrrverandi starfsmenn Sælukots og aðstandendur barna sem þar hafa dvalið sendu frá sér yfirlýsingu um miðjan nóvember þar sem þess var krafist að skólanum yrði lokað og róttækar breytingar gerðar á starfsháttum hans. Var bent á að starfsmaður skólans sem hafði verið sakaður um kynferðisbrot gegn einu barnanna hafi oft verið látinn vera einn með börnum og hafi hann meðal annar skipt á þeim.
Úttekt á starfsemi skólans stendur nú yfir af hálfu Reykjavíkurborgar.
Lögmaðurinn bendir á að skólinn hafi starfað við góðan orðstír í 37 ár og hafi enginn eftirlitsaðili gert alvarlegar athugasemdir við starfsemi skólans. Varðandi ásakanir um kynferðisbrot starfsmanns segir í yfirlýsingunni að þegar ásakanirnar hafi verið bornar fram hafi umræddur starfsmaður verið sendur í leyfi og haft hafið verið samband við barnavernd. Hafi Barnavernd Reykjavíkur lokið málinu án frekari athugasemda:
„Barnavernd Reykjavíkur lauk málinu án frekari athugasemda. Sama mál hefur nú verið kært til lögreglu af hálfu aðstandenda. Stjórnendur leikskólans hafa ekki vitneskju um stöðu þeirrar rannsóknar en tekið skal fram að umræddur starfsmaður starfar ekki lengur á Sælukoti.“
Þá segir ennfremur í yfirlýsingunni:
„Stjórnendur Sælukots fagna úttekt á starfsemi skólans enda hafa stjórnendur, foreldrar og borgaryfirvöld þá sameiginlegu hagsmuni að skapa börnum umhverfi þar sem áhersla er lögð á velferð, öryggi og menntun barna.“