Fasteignasalan Remax auglýsti í dag 932 fermetra einbýlishús við Sunnuflöt í Garðabæ til sölu. Húsið er eitt stærsta einbýlishús landsins og stendur við eina eftirsóknarverðustu götu Garðabæjar.
Litlar upplýsingar fylgja með auglýsingunni, og raunar aðeins tvær myndir. Ein að utan, sem birt er hér að ofan, og ein yfirlitsmynd sem sjá má inni í auglýsingunni. Sést þar stærð hússins vel í samanburði við önnur reisuleg einbýlishús við götuna.
Þá kemur jafnframt fram að brunabótamat hússins séu tæp 351 milljón og fasteignamat um 291 milljón. Ekkert er áhvílandi á eigninni.
Eigandi hússins er Halldór Kristmansson, fyrrum framkvæmdastjóri hjá Alvogen. Frásagnir ónefnds uppljóstrara um vinnuandann og umhverfi innan lyfjafyrirtækisins ollu miklu fjaðrafoki fyrr á árinu, en síðar kom á daginn að uppljóstrarinn var Halldór. Greindi hann frá vinnustaðaeinelti og áreitni af hendi Róberts Wessman, eiganda lyfjarisans.
Húsið hefur jafnframt áður verið til umfjöllunar, en í kjölfar efnahagshrunsins 2008 gekk húsið undir viðurnefninu „2007 martröðin.“ Athafnakonan Íris Björk Jónsdóttir hafði keypt hús sem áður stóð á lóðinni árið 2006 fyrir 50 milljónir og látið rífa það. Síðar seldi hún húsið auk teikninga að nýju húsi á 70 milljónir.
Sá sem keypti húsið af Írisi lýsti því síðar í Séð og heyrt hvernig kaupin snérust upp í martröð þegar hrunið skall á og þau hjónin sæju fram á að missa húsið. Kaupandinn fór að lokum í þrot og Landsbankinn leysti til sín húsið. Húsið var þá óklárað og var sett á sölu árið 2012, þá á 93 milljónir. Síðar var það lækkað niður í 69 milljónir og svo í 60 milljónir. Hafði DV eftir sérfræðingi hjá Eignamiðlun árið 2012 að um 150 milljónir myndi kosta að klára byggingu hússins.
Halldór keypti svo húsið árið 2014 og kláraði það. Hafði Kjarninn eftir Halldóri að honum hafi boðist að kaupa húsið á mjög góðu verði, en að hann ætlaði að minnka það.
Engum þinglýstum gögnum eru til um hvað Halldór greiddi fyrir húsið, en miðað við ástand fasteignamarkaðarins í dag og fermetraverð á Sunnuflötinni, er ljóst að um arðbæra fjárfestingu hefur verið að ræða. „2007 martröðin,“ er hið minnsta orðið rangnefni.
Ekkert ásett verð er auglýst, en aðeins óskað eftir tilboðum.
