Suður afríski læknirinn sem fyrstur lækna sagði frá Omicron afbrigði Covid-19 veirunnar varar nú við upphlaupi vegna uppgötvunar sinnar og segir einkenni vegna Omicron smita mild og að allir Omicron smitaðir sjúklingar hennar hafi náð sér að fullu.

Angelique Coetzee, stjórnarformaður læknafélags Suður Afríku, sagði við fréttaveitu AFP um helgina að hún hefði sinnt um 30 Omicron smituðum einstaklingum yfir tíu daga tímabil. Helsta einkennið er mikil þreyta, segir Angelique. Af öðrum einkennum má nefna smávægilega beinverki, þurran hósta og nokkrir sjúklingar hennar fengu minniháttar hita.

Hún sagði jafnframt að einkennin pössuðu ekki við Delta afbrigðið sem er ráðandi í Suður Afríku.

Viðbrögð umheimsins voru býsna harkaleg, að sögn Angelique, en flest lönd heims vöruðu við ferðalögum til nokkurra landa í sunnanverðri Afríku, þar á meðal Suður Afríku. Önnur bönnuðu hreinlega komur ferðamanna sem dvalið hafa á svæðinu. Marokkó gekk meira að segja svo langt að banna komur sinna eigin ríkisborgara.

Angelique sagði jafnframt í viðtalinu við AFP að það væri „óheppilegt“ að Omicron afbrigðið hafi verið málað sem hættulegt afbrigði á meðan svo lítið væri vitað um það. Hún útilokaði þó ekki að niðurstöður hennar gætu breyst, en undirstrikaði að hingað til hafa sjúklingar hennar sýnt væg einkenni.

Samkvæmt opinberum tölum í Suður Afríku hafa um 75% Covid-19 tilfella í Suður Afríku reynst vera Omicron afbrigði veirunnar. Þrátt fyrir stökk í fjölda smita undanfarna daga um gjörvalla Afríku er staðan enn nokkuð góð miðað við aðra hluta heimsins. Um 2.9 milljón tilfella hafa greinst í heimsálfunni og dauðsföll í Suður Afríku um 90 þúsund.

Samtals hafa í heimsálfunni allri um 222 þúsund látist af völdum Covid-19. Til samanburðar má nefna að 400 þúsund látast á hverju ári vegna malaríu og um 600 þúsund af alnæmi í heimsálfunni.