Þeir eru margir metrar á breidd og enn dýpri og hafa valdið vísindamönnum um allan heim heilabrotum. Hér er um að ræða risastóra gíga sem hafa myndast í rússnesku túndrunni. Ekki er vitað með vissu hvað veldur því að þessir stóru gígar myndast en líklega koma loftslagsbreytingarnar þar við sögu.

Gígarnir myndast við sprengingar neðanjarðar. Sprengiefnið er metan sem hefur legið í jörðinni í óratíma vegna sífrerans en nú leitar það upp því hækkandi hitastig á heimskautasvæðum í Síberíu veldur því að sífrerinn þiðnar.

Fyrstu gígarnri uppgötvuðust 2014 þegar þyrla flaug fyrir tilviljun yfir túndruna. Síðan hafa 17 gígar fundist. Sá nýjasti hefur fengið heitið C17 en hann er 25 metrar í þvermál og 33 metrar á dýpt. Hann er á Yamalskaga.

Vitað er að sprengingarnar verða af völdum metans sem leitar skyndilega upp á við af því að sífrerinn þiðnar. En enginn veit af hverju metanið springur.

Svipaðir hlutir hafa gerst annars staðar þar sem ís hefur bráðnað, meðal annars á Grænlandi en þó hafa ekki orðið viðlíka sprengingar og hafa orðið í Rússlandi.