Klukkan 21.23 í gærkvöldi var lögreglunni tilkynnt um líkamsárás og ránstilraun í Kópavogi. Þar hafði 13 ára drengur verið sleginn í höfuðið með barefli af pari sem hafði veist að honum og krafið hann um allt sem hann hafði meðferðis. Parið forðaði sér tómhent af vettvangi í strætisvagni án þess að ná mununum af drengnum. Málið er til rannsóknar.

Ungur maður hlaut höfuðáverka á tíunda tímanum í gærkvöldi þegar hann datt af rafmagnshlaupahjóli í Háaleitis- og Bústaðahverfi. Hann var fluttur með sjúkrabifreið á bráðadeild. Ekki liggja fyrir frekari upplýsingar um alvarleika áverka hans.

Tveir ökumenn voru handteknir í gærkvöldi grunaðir um að vera undir áhrifum fíkniefna og akstur sviptir ökuréttindum.

Einn ökumaður var kærður fyrir að hafa notað farsíma í akstri en hann lenti í umferðaróhappi í Árbæ á fyrsta tímanum í nótt.

Einn ökumaður var kærður fyrir akstur á móti rauðu ljósi og annar fyrir að aka með útrunnin ökuréttindi. Sá þriðji var kærður fyrir að nota farsíma í akstri.