Krafa Guðmundar Baldurssonar, stjórnarmanns í Eflingu, um að bréf trúnaðarmanna sem sent hafði verið á formann, varaformann og framkvæmdastjóra Eflingar, yrði gert opinbert, varð til þess að Sólveig Anna Jónsdóttir, sagði af sér formennsku Eflingar, með harðorðri yfirlýsingu á Facebook-síðu sinni á sunnudagskvöld.
Fréttablaðið birtir í dag yfirlýsingu frá Guðmundi þar sem hann sakar Sólveigu um að hafa haldið lykilupplýsingum leyndum frá stjórninni til að hylma yfir vanlíðan starfsfólks á skrifstofu Eflingar. Segir hann að alvarlegur trúnaðarbrestur hafi orðið innan stjórnarinnar eftir að Sólveig Anna neitaði að kynna fyrir stjórninni starfslokasamning við fráfarandi skrifstofustjóra í upphafi ársins.
Í stuttu samtali við DV velti Guðmundur upp þeirri spurningu hvort varaformaður Eflingar, Agnieszka Ewa Ziółkowska, þurfi að segja af sér, líkt og formaðurinn og framkvæmdastjórinn, þar sem hún hafi vitað af tilurð bréfs trúnaðarmanna eins og þau en kosið að halda því leyndu. Þess má geta að Guðmundur fer yfir þessi mál í viðtali við Kastljós í kvöld.
Yfirlýsingin er eftirfarandi:
Í ljósi afsagnar Sólveigar Önnu Jónsdóttur, formanns Eflingar, og uppsagnar Viðar Þorsteinssonar, framkvæmdastjóra stéttarfélagsins, vil ég koma því á framfæri að Sólveig Anna hefur haldið lykilupplýsingum leyndum frá stjórninni til að hylma yfir vanlíðan starfsfólks á skrifstofu Eflingar.
Alvarlegur trúnaðarbrestur varð innan stjórnarinnar þegar Sólveig Anna neitaði að kynna fyrir stjórninni starfslokasamning við fráfarandi skrifstofustjóra í upphafi ársins. Því var ítrekað borið við að þessar upplýsingar kæmu stjórninni einfaldlega ekki við. Aftur var stjórninni neitað um kynningu á ályktun trúnaðarmanna um stjórnunarvanda í júní.
Þegar ég gekk á eftir ályktuninni var mér ekki aðeins ítrekað neitað um hana heldur gerð tilraun til að beita mig persónulegri kúgun á grundvelli þess að formaðurinn hefði aðstoðað mína nánustu. Ég lagði fram tillögu um að utanaðkomandi ráðgjafi væri fenginn til að fara í gegnum starfsemina til að leita lausna og var því alfarið hafnað. Þess í stað var boðið upp á hvítþvott mannauðsstjóra á stjórnarfundi um miðjan júlí.
Enginn í stjórninni veitti mér stuðning í þessu máli og enga hjálp var að fá hjá SGS og ASÍ þrátt fyrir að fyrir lægi að stjórnin ætti óskoraðan rétt á öllum lykilupplýsingum um starfsemi Eflingar. Sólveig Anna hefur hvorki brugðist við áskorun starfsmanna um betrumbætur né gengist við ábyrgð sinni sem formaður. Þvert á móti hefur hún skellt skuldinni á mig og starfsmenn sína. Botninum náði hún svo þegar hún krafðist þess að starfsmenn veldu á milli þeirra sjálfra og hennar á starfsmannafundi síðastliðinn föstudagsmorgun. Í kjölfarið sló hún í síðasta sinn á sáttarhönd starfsmannanna. Stéttarfélögum ber að vera fyrirmynd í vinnuveitendahlutverki sínu, annað er ekki lýðandi.
