Málsvarnarkostnaður þeirra þriggja sem sýknuð voru í Rauðagerðismálinu svokallaða í gær nemur samtals um 52 milljónum. Þá er ótalinn sakarkostnaður og annar kostnaður ákæruvaldsins og lögreglu vegna rannsóknar á þætti þeirra í málinu. Samkvæmt yfirlýsingum lögreglu er um að ræða umfangsmestu lögreglurannsókn Íslandssögunnar. Þá hefur komið fram að tugir lögreglumanna komu að henni með einum hætti eða öðrum.

Tekið skal fram að miklar líkur eru taldar á að umræddum dómi héraðsdóms verði áfrýjað til Landsréttar, og því er ekki loku fyrir því skotið að endanleg niðurstaða verði önnur en sú sem nú blasir við.

Engu að síður standa leikar þannig, að þau þrjú sem ákærð voru með Angjelin Sterkaj, eru nú frjáls ferða sinna, þrátt fyrir að hafa sætt stöðu grunaðra í lögreglurannsókn og gæsluvarðhaldi vegna rannsóknarinnar. Fjölmargir aðrir sættu gæsluvarðhaldi við rannsókn málsins og hafa hið minnsta nokkrir þeirra boðað miskabótamál vegna þess.

Embætti ríkissaksóknara hefur nú fjórar vikur til þess að ákveða hvort það áfrýi sýknudómum. Sama gildir um Angjelin og lögmann hans. Allar líkur eru þó á að málið, með einum hætti eða öðrum, endi í Landsrétti. Þannig þarf að hafa þann fyrirvara á að sýknudómar geta breyst.

Taki málið snúning í Landsrétti með sömu útkomu má búast við enn hærri reikningi frá lögmönnum sakborninganna í málinu, sem einnig lenti á herðum ríkisins.

Þannig er það stór ákvörðun að ákveða áfrýjun og getur haft fjárhagslegar afleiðingar fyrir hið opinbera.

Kostnaðurinn eins og hann stendur nú í rúmum 52 milljónum myndi þannig duga til þess að borga 55 hjúkrunarfræðingum laun í mánuð, eða 86 leikskólakennurum, ef miðað er við upplýsingar frá Hagstofunni um meðallaun.