Á fjórða tímanum í nótt henti maður, sem er sagður hafa verið ógnandi, vörum út um öll gólf verslunar í miðborginni. Hann var farinn af vettvangi er lögreglan kom en fannst skömmu síðar. Hann var í annarlegu ástandi og vildi ekki tjá sig um það sem gerst hafði.

Á sjötta tímanum í gær var maður í annarlegu ástandi staðinn að vöruþjófnaði úr verslun í miðborginni. Hann reyndist vera á reynslulausn og má ekki neyta vímuefna. Hann var handtekinn og vistaður í fangageymslu. Á áttunda tímanum voru tvær konur staðnar að þjófnaði á matvöru úr verslun í Hlíðahverfi. Þær voru fluttar á lögreglustöð til skýrslutöku en voru síðan frjálsar ferða sinna.

Um klukkan 20 var tilkynnt um umferðaróhapp og afstungu í Árbæjarhverfi, engin slys urðu á fólki. Tjónvaldurinn var handtekinn skömmu síðar en hann er grunaður um ölvun við akstur. Hann sagðist hafa drukkið áfengi eftir að akstri lauk. Hann var fluttur til hefðbundinnar sýnatöku og síðan vistaður í fangageymslu.

Tveir ökumenn voru handteknir í nótt, grunaðir um að vera undir áhrifum fíkniefna. Annar þeirra reyndist vera sviptur ökuréttindum og var þetta ekki í fyrsta sinn sem hann er staðinn að akstri eftir að hann var sviptur ökuréttindum.