Ágúst Arnar Ágústsson, annar eigandi pizzustaðarins Slæs sem nýlega var opnaður í Iðnbúð 2 í Garðabæ, segir fréttir og orðróm um að merki félagsins sé stolið vera kolrangar. Hann bendir á að merkið hafi verið keypt í stærsta myndabanka heims, Shutterstock. Ágúst hafði samband við DV og greindi frá þessu.
DV greindi í gær frá umræðum í Facebook-hópnum Markaðsnördar þar sem því var haldið fram að merki staðarins væri stolið.
Rekstrarfélag pizzustaðarins Slæs er í eigu Einars Ágústssonar, bróður Ágústs Arnar Ágústssonar. Einar var sakfelldur fyrir fjársvik í tengslum við fjársöfnunarsíðuna Kickstarter.
Þá hefur ákæra á hendur Einar og Ágústi verið þingfest í Héraðsdómi Reykjavíkur en þeir eru ákærðir fyrir fjársvik og peningaþvætti í tengslum við trúfélagið Zúista sem þeir stofnuðu árið 2015.
Heiti pizzustaðains Slæs er skemmtileg vísun í enska orðið slice, eða sneið, og vísar þá væntanlega til pizzusneiðar. 30% opnunartilboð er á öllum pizzum Slæs samkvæmt Facebook-síðu staðarins.