Vopnað rán var framið á KFC í Sundagörðum milli kl. 19 og 20 í kvöld. Þetta kemur fram á vef Fréttablaðsins.
Grímuklæddur maður, vopnaður tveimur eldhúshnífum, ógnaði þar starfsstúlku í afgreiðslunni. Fjórir lögreglubílar voru sendir á vettvang til að bregðast við ráninu en lögreglan vildi ekki tjá sig við Fréttablaðið um málið.
Ekki kemur fram í fréttinni hvort maðurinn hafði peninga á brott með sér eða ekki en afgreiðslustúlkan opnaði peningakassann. Rætt er við vitni sem segja afgreiðslufólk og viðskiptavini hafa hlaupið út af staðnum. Þá segir að afgreiðslustúlkan hafi verið í miklu áfalli er hún var flutt á lögreglustöðu til skýrslutöku vegna málsins.
Uppfært kl. 23:25:
Í tilkynningu úr dagbók lögreglu sem send var til fjölmiðla í kvöld segir að maðurinn hafi verið handtekinn og enginn hafi hlotið meiðsl í árásinni:
„Laust eftir 19:30 í kvöld var tilkynnt um rán á skyndibitastað í austurhluta borgarinnar. Gerandinn, karlmaður, var handtekinn stuttu siðar nærri vettvangi í mjög annarlegu ástandi. Hann hafði ógnað starfsfólki með eggvopni en náði engum fjármunum. Karlmaðurinn gistir nú fangageymslur og rætt verður við hann morgun. Starfsfólk fyrirtækisins fékk sálræna aðstoð frá lögreglu en einn aðili þurfti aðhlynningu á slysadeild vegna áfallsins. Engin líkamleg meiðsli voru á fólki.“
