Fjöldi greindra Covid-19 smita í gær, 46, er sá mesti síðan 3. september og tæplega tvöfalt fleiri greindust í gær en daginn áður. Þórólfur Guðnason sóttvarnalæknir segist ekki sjá ástæðu til að spá í hertar sóttvarnaaðgerðir byggt á smittölum eins dags. Auk þess hafi töluvert fleiri sýni verið tekin í gær en á sunnudag, en fjöldi sýna í gær var tæplega 3.000.
„Við erum ekki endilega að hlaupa til út af tölum milli daga, það má alveg búast við að sjá þetta hlaupa upp og niður. Ástandið er tiltölulega óbreytt á Landspítalanum, þannig að við höldum niðri í okkur andanum með þetta,“ segir Þórólfur.
Aðspurður segir hann að ekki sé hópsýking inni í þessum tölum. „Þetta er aðallega á höfuðborgarsvæðinu en líka eitthvað dreift um landið. Þetta er nokkuð dreift um borgina og ég veit svo sem ekki nákvæmlega á þessari stundu hvaðan þessi smit koma.“
Þórólfur segir að skýringin gæti raunverulega verið sú að faraldurinn sé á uppleið en skoða þurfi tölur næstu daga áður en nokkuð sé hægt að segja til um það.