Alloft hafa komið upp í fjölmiðlum mál sem sýna hvað það getur verið erfitt að fá lögskilnað ef hjón eru ekki ásátt um að fara þá leið. Á hinn bóginn er að finna í hjúskaparlögum grein sem bendir til þess að auðveldara sé að fá skilnað að borði og sæng. 34. gr. hjúskaparlaga er eftirfarandi:

„Maki, sem telur sig ekki geta haldið áfram hjúskap, á rétt á skilnaði að borði og sæng.“

Á grundvelli þessarar greinar hefur kona ein sem býr í þorpi á Suðurnesjum sótt um skilnað að borði og sæng frá eiginmanni sínum, sem hún veit ekki hvar er niðurkominn. Tilkynning um stefnu vegna málsins var birt í Lögbirtingablaðinu á föstudag.

Hjónin eru bæði erlend. Konan er frá Póllandi en maðurinn frá Egyptalandi. Þau hófu sambúð hér á landi í júlí árið 202o og giftust í september sama ár. Samkvæmt stefnunni fór maðurinn að sýna af sér árásargirni fljótlega eftir giftinguna: „Stuttu eftir giftingu fór stefndi að sýna stefnanda árásargirni og atferli sem benti til þess að aðalástæða stefnda fyrir hjúskap væri dvalarleyfi“ segir orðrétt í stefnunni.

Konan sleit sambúðinni í desember 2020 og hóf sambúð með öðrum manni í janúar á þessu ári. Eiginmanni hennar mun var kunnugt um það samband. Í sama mánuði óskaði hún eftir skilnaði að borð og sæng hjá Sýslumanninum á Suðurnesjum. Eiginmaðurinn kom til viðtals hjá sýslumanni í febrúar og neitaði konunni þar um skilnað. Sýslumaður vísaði málinu frá.

Konan ákvað þá að stefna manninum fyrir héraðsdóm og er þess krafist að henni verði veittur skilnaður að borði og sæng. Ekki hefur tekist að finna manninn til að birta honum stefnuna og er talið að hann sé farinn úr landi. Þess vegna er stefnan birt í Lögbirtingablaðinu.

Málið verður þingfest í Héraðsdómi Reykjaness þann 29. september og í tilkynningunni er skorað á manninn að mæta fyrir dómi. Það kemur síðan í ljós síðar í haust, eftir því sem málinu vindur fram fyrir dómi, hvort konan fær skilnað að borði og sæng frá manni sem hún býr ekki með og veit ekki hvar er niðurkominn.