Björn Ingi Hrafnsson, ritstjóri Viljans og sérlegur áhugamaður um Covid-19 veiruna, hefur ekki alltaf átt sjö dagana sæla þegar kemur að fjármálum. Árið 2017 fór félag Björns, sem sá þá um útgáfu Pressunar, Bleikt.is og 433.is, í gjaldþrot.

Í fyrra var Björn dæmdur til að greiða þrotabúi félagsins 80 milljón krónur. Þessar 80 milljónir áttu að hafa verið endurgreiðsla á láni frá Birni en þegar lögmenn félagsins fóru yfir bókhaldið kom í ljós að lánið hafði aldrei verið veitt. Frjáls fjölmiðlun, félagið sem tók yfir eignir félags Björns á sínum tíma, átti að taka yfir skuld félagsins við Björn en þegar upp komst að skuldin var Björns megin var því að sjálfsögðu rift.

Ekki var nóg að Björn hafi verið dæmdur til að greiða 80 milljónir í fyrra heldur fór einnig sýslumaður fram á gjaldþrotaskipti Viljans, fjölmiðilsins sem hann á og stýrir í dag. Sem betur fer fyrir Björn náði hann að snúa vörn í sókn og var beiðnin um gjaldþrotaskipti afturkölluð.

„Auðvitað hef ég fundið velvilja undanfarna mánuði í þessum COVID-19 slag öllum, en þetta kom mér samt ánægjulega á óvart og fyrir það er ég þakklátur,“ sagði Björn Ingi á Facebook-síðu sinni í kjölfarið.

Björn gaf í fyrra út bókina Vörn gegn veiru þar sem hann fjallaði um faraldur kórónuveirunnar hér á landi. Þá hefur hann verið afar áberandi á blaðamannafundum þríeykisins í faraldrinum.

Ljóst er að það hefur birt til í fjármálum Björns en hann gerði ansi vel á árinu 2020. Í Tekjublaði DV, sem kom út í dag, má sjá að Björn fékk ansi góð laun á árinu 2020, eða 4.029.203 krónur á mánuði.