Í lokuðum Facebook-hópi eru konur nú varaðar við að stofna til kynna við Joshua Ikechukwu Mogbolu. Hópurinn telur hátt í sjö þúsund meðlimi en þar eru gjarnan birtar færslur þar sem konum er ráðlagt að vara sig á ákveðnum einstaklingum á stefnumótaforritum.
Joshua, sem er fæddur árið 2000 og býr í Hafnarfirði, var í síðustu viku dæmdur í fjögurra og hálfs árs fangelsi fyrir að nauðga tveimur konum, og í dag var greint frá því að hann væri í gæsluvarðhaldi í fangelsinu á Hólmsheiði, grunaður um þriðju nauðgunina. Sú nauðgun á að hafa verið framin á á höfuðborgarsvæðinu fyrir nokkrum vikum.
Sjá einnig: Joshua í gæsluvarðhaldi grunaður um nauðgun
Í færslunni sem varðar Joshua í lokaða Facebook-hópnum kemur fram að hann hafi notast við stefnumótaforritið Tinder og þá eru einnig birtar tvær myndir af honum. Auk þess er vísað í frétt um hann og dóm Héraðsóms Reykjaness yfir honum. Færslan er eftirfarandi:
„Hæ. Þetta er Joshua Mogbolu. Hann hefur verið á Tinder og hitti meðal annars annan brotaþolann á Tinder.“
Líkt og áður segir var Joshua í síðustu viku dæmdur í Héraðsdómi Reykjaness fyrir að nauðga tveimur konum. Annað atvikið átti sér stað á höfuðborgarsvæðinu en hitt á Akureyri.
Í atvikinu sem átti sér stað á höfuðborgarsvæðinu fór Joshua heim með konu af djamminu. Í kjallaraíbúð nauðgaði hann henni, en hætti skyndilega. Þá flúði hún og kallaði á hjálp. Hann elti hana og náði henni og fór aftur með hana í kjallaraíbúðina og nauðgaði aftur. Konan lýsti því að hún hefði óttast um líf sitt.
Sjá einnig: Joshua dæmdur fyrir að nauðga tveimur konum
Seinna atvikið átti sér stað á Akureyri, en þar hitti hann konu á Tinder-deiti og fóru þau saman í lítið samkvæmi. Þar dró hann hana inn á baðherbergi og nauðgað henni.
Joshua neitaði sök í báðum tilvikunum.
Fyrir þessar nauðganir fékk hann fjögurra og hálfs árs fangelsisdóm. Auk þess þarf hann að greiða annarri konunni 2 milljónir króna og hinni konunni 1,3 milljónir í miskabætur. Þá mun hann þurfa að greiða 5,2 milljónir í málskostnað.
