Landsréttur staðfesti í dag dóm héraðsdóms frá því í fyrra yfir Þresti Emilssyni en hann var sakfelldur fyrir fjárdrátt í starfi sínu sem framkvæmdastjóri ADHD-samtakanna, sem og fyrir umboðssvik og peningaþvætti. Þröstur er fyrrverandi sjónvarpsfréttamaður hjá Ríkissjónvarpinu.
Þröstur var sakfelldur fyrir að hafa dregið sér tæplega 7,2 milljónir úr sjóðum samtakanna á tímabilinu 2015 til 2018, með debetkorti, greiðslu reikninga í eigin þágu, veitingu styrks og með millifærslum af bankareikningum samtakanna.
Hann var ennfremur sakfelldur fyrir umboðssvik með því að nota kreditkort félagsins til eigin nota í 131 skipti fyrir rúmlega 2 milljónir króna.
Þá var Þröstur sakfelldur með því að hafa nýtt sér ávinning af brotunum.
Þröstur játaði brot sín skýlaust og var dæmdur í 10 mánaða fangelsi.
Fyrir Landsrétti krafðist ákæruvaldið þess að refsing yfir Þresti yrði þyngd. Því hafnaði Landsréttur og skal dómur héraðsdóms standa óraskaður.
