Stjórn Landssambands Lögreglumanna lýsir yfir miklum áhyggjum af þeirri stöðu sem lögreglan stendur frammi fyrir. Þetta kemur fram í yfirlýsingu á heimasíðu félagsins.
Í henni kemur fram að alltof fáir lögreglumenn eru við störf hérlendis auk þess sem hlutfall lærðra lögreglumanna er hættulega lágt. Ástandið var erfitt fyrir en ljóst sé að eftir að stytting vinnuvikunnar tók gildi þann 1.maí síðastliðinn telur stjórnin að staða löggæslu á Íslandi hafi versnað til muna.
Í umfjöllun RÚV á dögunum kom fram að þörf væri á 75 nýjum lögreglumönnum til starfa vegna styttingar vinnuvikunnar og að kostnaðurinn við það væri um 900 milljónir króna.
Þrátt fyrir stöðuna þá segir stjórn LL að ekkert bóli á auknu fjármagni frá ríkisvaldinu til að ráða viðbótarmannskap. Það hefur í för með sér að færri lögreglumenn eru á vakt hverju sinni og að þetta ástand dragi verulega úr öryggi lögreglumanna og almennings.
Þá er greinilega að stjórn LL undrast andvaraleysi ríkisvaldsins. Þegar samið var um styttri vinnuviku fyrir vaktavinnufólk hlýtur ríkisvaldinu að hafa verið ljóst að ráða þyrfti fleiri lögreglumenn til starfa og setja aukið fé í menntun lögreglumanna.
Stjórn LL krefst þess að ráðamenn standi við gerða samninga og veiti það fjármagn sem þarf til þess að manna lögregluna með viðunandi hætti.