Landsréttur sneri í dag við dómi héraðsdóms gegn Kristjáni Einari Sigurbjörnssyni fyrir líkamsárás. Telur Landsréttur héraðsdóm ekki hafa fært sönnur á að Kristján hafi gerst sekur um brotið.
Kristján er þekkt Instagram stjarna en samband hans og stórsöngkonunnar Svölu Björgvinsdóttur hefur vakið athygli, ekki síst þar sem á milli þeirra er 21 árs aldursmunur.
Kristján var í desember síðastliðnum ákærður fyrir hótanir gegn lögreglumönnum en það mál hefur ekki verið tekið fyrir hjá dómstólum. Árið 2016 var hann ákærður fyrir að hafa hlaupið niður konu og ýtt henni þannig að hún féll í götuna og hlaut beinbrot á „fjarenda vinstri sveifar og ótilfært þverbrot fremst á ölnarbeini vinstri handleggs“. Átti þetta að hafa gerst utandyra í Hafnarstræti í Reykjavík. Málið var ekki tekið fyrir í héraðsdómi fyrr en þremur árum eftir atvikið. Þar var hann fundinn sekur um líkamsárás og dæmdur í þriggja mánaða skilorðsbundið fangelsi. Ennfremur þurfti hann að greiða hálfa milljón í skaða- og miskabætur.
Kristján neitaði sök fyrir dómi og sagði að brotaþoli hefði gengið í veg fyrir hann og neitaði hann að hafa ýtt við konunni. Sagðist hann hafa verið að hlaupa á eftir þáverandi kærustu sinni eftir að hafa gert sér upp flogakast til að vekja athygli hennar. Hann hefði verið ölvaður og ekki haft ásetning til að ráðast á brotaþola.
Framburður vitna gaf til kynna að konan hefði gengið í veg fyrir Kristján og hafði það atriði mikið vægi í niðurstöðu Landsréttar. Ekki sé samræmi á milli framburðar brotaþola og tveggja vitna að atvikinu, segir Landsréttur. Því sé ekki hafið yfir skynsamlegan vafa að Kristján hafi valdið meiðslum konunnar með ásetningi eða haft ásetning til líkamsárásar eins og kært var fyrir.
Kristján hafði einnig verið sakfelldur fyrir væg fíkniefnabrot í héraðsdómi og voru þau hluti af ákærunni, en Landsréttur ákvað að gera honum ekki refsingu fyrir þau. Er honum því ekki gerð refsing og einkaréttarkröfu brotaþola var vísað frá dómi. Sakarkostnaður greiðist úr ríkissjóði og áfrýjunarkostnaður sömuleiðis.
