Landsréttur staðfesti í dag dóm héraðsdóms yfir manni á sjötugsaldri, Auðuni Þorgrími Þorgrímssyni, fyrir þjófnað á báti.
Auðunn á nokkuð skrautlegan brotaferil að baki. Í fyrra sakfelldi héraðsdómur hann fyrir að hafa árið 2017 hellt málningu yfir bíl sem lagt var í bílakjallara. Hann var einnig sakfelldur fyrir að hafa ári síðar, þ.e. 2018, stolið bát af gerðinni Setland sem stóð á kerru við Fornubúðir í Hafnarfirði. Bátinn flutti hann frá Fornubúðum og kom honum fyrir á milli gáma á byggingarsvæði við Krókháls 11, þar sem hann málaði síður bátsins grænar en báturinn hafði haft bláar síður.
Auðunn áfrýjaði til Landsréttar þeim hluta ákærunnar sem laut að þjófnaði á bátnum. Sagðist hann hafa keypt bátinn og lagði til grundvallar þeirri staðhæfingu 200 þúsund króna úttekt af bankareikningi sínum. Honum tókst hins vegar ekki að færa sönnur á að eiganda bátsins hefði verið afhent þetta kaupverð.
Staðfesti Landsréttur sakfellingu Auðuns í þjófnaðarmálinu og skal dómur héraðsdóms vera óraskaður. Fékk hann 30 daga skilorðsbundið fangelsi. Hann þarf jafnframt að greiða allan áfrýjunarkostnað fyrir Landsrétti.
Árið 2009 framdi Auðunn miklu alvarlegri glæp. Þá bar hann eld að húsinu Tryggvagötu 10 í Reykjavík. Hellti hann bensíni í sameign hússins og kveikti í. Varð húsið alelda svo stórhætta hlaust af. Íbúi í húsinu komst út við illan leik en sem betur fer varð ekkert manntjón.
Fyrir þetta hlaut Auðunn tveggja ára fangelsi í dómi sem kveðinn var upp árið 2010.
