Alþýðusamband Íslands (ASÍ) segir flugfélagið Play brjóta lög með því að ákveða sjálft í hvaða stéttarfélagi starfsfólk þeirra er. ASÍ stendur fast við þær yfirlýsingar sem hafa verið gerðar um að launakjörin sem Play býður starfsmönnum upp á séu ekki mönnum bjóðandi.
Birgir Jónsson, forstjóri flugfélagsins Play, sagði fyrr í dag framgöngu ASÍ gagnvart félaginu með ólíkindum, en ASÍ hvatti landsmenn og fjárfesta til að sniðganga félagið þar til það hefði bætt þau launakjör sem starfsmönnum er boðið upp á. Play krafðist þess að ASÍ drægi fullyrðingar sínar til baka en ljóst er að við því verður ekki. Þess heldur hefur ASÍ ritað aðra yfirlýsingu þar sem launakjör flugfreyja- og þjóna hjá Icelandair eru borin saman við kjörin sem bjóðast hjá Play.
ASÍ bendir ennfremur á að hvergi sé í samningi Play við stéttarfélagið ÍFF að finna ákvæði um framlög til starfsendurhæfingar, orlofssjóð, starfsmenntasjóð eða sjúkrasjóð en þeir þættir séu lykilþættir í kjörum launþega. Lífeyrisgreiðslur eigi að greiða af grunnlaunum og aðeins séu tryggðar greiðslur uppá 12 prósent í lífeyrissjóð sem sé afturför frá almennum kjarasamningum.
Eins geri samningurinn ekki ráð fyrir fjarvistum vegna veikinda barna.
„Ekki er kveðið á um sérstakar greiðslur fyrir varavaktir eða námskeiðssetu. Að auki eru greiddir dagpeningar lægri hjá Play en Icelandair en þeir teljast ekki til heildarlauna og eiga að mæta útlögðum kostnaði.“
ASÍ segir að félagið ÍFF beri öll þess merki að vera gult stéttarfélag en slík félög gangi gjarnan erinda atvinnurekenda og standi geng hagsmunum og lágmarkskjörum launafólks. Eins sé á huldu hvernig samningurinn varð til, hver skrifi undir hann og hvernig hann var samþykktur.
„Félagið ÍFF ber öll merki þess að vera svokallað „gult stéttarfélag“. Slík félög standa alla jafna utan heildarsamtaka launafólks og ganga jafnvel erinda atvinnurekenda og gegn hagsmunum og lágmarskjörum launafólks. Óljóst er hvernig samningurinn er tilkominn, hver undirritar og hvernig hann var samþykktur.
Forsvarsmenn Play virðast svo telja það sitt hlutverk að ákveða í hvaða stéttarfélagi starfsfólk þeirra er en það brýtur í bága við lög. Stofnun „gulra félaga“ hefur víða um heim reynst liður í að brjóta skipulagða verkalýðshreyfingu á bak aftur. Heildarsamtök launafólks munu ekki sitja þegjandi hjá þegar slík aðför er gerð að réttindum almennings á Íslandi. Play ætti að sjá sóma sinn í að „drífa sig út“ og gera raunverulegan kjarasamning við stéttarfélag launafólks.“
